लासलगाव बाह्य वळण रस्त्याचे काम लवकरच पूर्ण करणार, सार्वजनिक बांधकाम मंत्री रवींद्र चव्हाण यांचे श्री.छगन भुजबळ यांच्या तारांकित प्रश्नाला होकार

मुंबई,नाशिक,दि.१६ मार्च :- लासलगाव बाह्य वळण रस्त्याचे काम भूसंपादनाअभावी रखडले आहे. याठिकाणी उड्डाणपुलाचे काम देखील पूर्ण झाले आहे. मात्र केवळ दोन्ही बाजूच्या अटॅचमेंट रस्ता भूसंपादनास निधी नसल्याने हे काम रखडले आहे. त्यामुळे लासलगाव बाह्य वळण रस्ता भूसंपादनासाठी प्राधान्याने निधीची तरतूद करण्यात येऊन काम पूर्ण करण्यात यावी अशी मागणी राज्याचे माजी उपमुख्यमंत्री छगन भुजबळ यांनी तारांकित प्रश्नाद्वारे सभागृहात केली. यावर उत्तर देतांना राज्याचे सार्वजनिक बांधकाम मंत्री रवींद्र चव्हाण यांनी या कामासाठी होकार दिला आहे.

तारांकित प्रश्न उपस्थित करतांना छगन भुजबळ म्हणाले की, लासलगाव बाह्य वळण रस्त्यासाठी आवश्यक जमिनीचे थेट खरेदी करून भूसंपादन करण्याकरिता येथील शेतकऱ्यांनी आवश्यक संमतीपत्र दिलेले आहे. यासाठी जिल्हाधिकारी कार्यालयाने थेट खरेदीसाठी दर सुद्धा निश्चित करून दिलेले आहे. सार्वजनिक बांधकाम विभागाने तात्काळ खरेदीखते नोंदवून शेतकऱ्यांना मोबदला अदा करून थेट खरेदीची कार्यवाही करणे आवश्यक आहे. अशी मागणी केली. त्यावरील उत्तरात हे काम मार्गी लावण्यात येईल अशी माहिती सार्वजनिक बांधकाम मंत्री रवींद्र चव्हाण दिली.