महाराष्ट्र विधान परिषदेच्या शिक्षक आणि पदवीधर मतदार संघाची निवडणूक जाहीर झालेली असून मुंबई पदवीधर , कोकण विभाग पदवीधर , तसेच नाशिक विभाग शिक्षक आणि मुंबई विभाग शिक्षक मतदार संघ अशा चार जागांसाठी निवडणूक होणार आहे. यासाठी 26 जून रोजी मतदान होणार असल्याचे केंद्रीय निवडणूक आयोगाने घोषित केले होते. परंतु यापैकी नाशिक विभाग शिक्षक मतदार संघाच्या निवडणुकीच्या मतदानाच्या वेळेत बदल करण्यात आलेला आहे. नाशिक विभाग शिक्षक मतदार संघ निवडणुकीच्या मतदानाची वेळ ही आधी सकाळी ८ ते दुपारी ४ वाजेपर्यंत ठेवण्यात आली होती परंतु या वेळेत बदल करण्यात आला असून मतदानाची सुधारित वेळ सकाळी ७ ते संध्याकाळी ६ वाजेपर्यंतची निश्चित करण्यात आलेली आहे. अशी माहिती नाशिक विभाग शिक्षण मतदारसंघाचे निवडणूक निर्णय अधिकारी तथा विभागीय आयुक्त डॉक्टर प्रवीण गेडाम यांनी दिली आहे.
