नाशिक रोड परिसरातून एक धक्कादायक घटना समोर आली आहे ,एका हॉटेल चालकावर दिवसाढवळ्या कोयत्याने वार करण्यात आला असून ही घटना सीसीटीव्हीत कैद झाली आहे .
याबाबत माहिती अशी की, नाशिक रोड येथील मुक्ती धाम येथे हॉटेल मथुरा या हॉटेलचे संचालक नितीन महानंद सचिदेव हे गेल्या दोन महिन्यापासून ही हॉटेल चालवत होते. राजवाडा देवळाली गाव येथे राहणारा डॅनियल उर्फ डॅनी थोरात हा वेटर त्यांच्याकडे काम करत आहे. शुक्रवारी दुपारी नितीन यांनी यास ग्राहकाकडे आणि कामाकडे लक्ष दे असे सांगितले असता त्याचा त्याला राग आल्याने डॅनी याने मालक नितीन सच देव यांच्याशी वाद घालून शिवीगाळ केली. आणि थांब तुला बघून घेतो असा दम देत तिथून निघून गेला. थोड्याच वेळात तो त्याच्या सात साथीदारा सोबत हॉटेल मध्ये घुसून नितिन हा काउंटर वर बसले असता त्यांना काही समजण्याच्या आत त्या टोळक्याने त्यांच्यावर कोयत्याने सपासप वार केले. नितीन जीव वाचवण्यासाठी सैरावैरा पडू लागला, त्याच्यामागे हल्लेखोर सुद्धा त्याचा पाठलाग करत होते. नितीन या हल्ल्यात गंभीर जखमी झाला . परिसरातील नागरिकांनी नितीन यांना नाशिक रोड येथील हिंदू हृदय सम्राट बाळासाहेब ठाकरे बिटको रुग्णालयात दाखल केले .हॉस्पिटलमध्ये डॉक्टरांनी नितीन यांच्यावर उपचार केले असून नितीन सचि देव यांच्या डोक्याला मोठा मार लागला असून सुमारे 15 टाके पडल्याची माहिती मिळत आहे. घटनेची माहिती मिळताच पोलीस घटनास्थळीत दाखल झाले. पोलिसांनी तातडीने कारवाई करीत तीन संशयतांना ताब्यात घेतले आहे. पुढील तपास वरिष्ठ पोलीस निरीक्षक जितेंद्र सपकाळे यांच्या मार्गदर्शनाखाली पोलीस करीत आहेत. दरम्यान हल्ला प्रकरणी नाशिक रोड परिसरात कोयता गॅंग पुन्हा संक्रिय होत असून, पोलिसांनी अशा गुंड प्रवृत्तीच्या समाजकंटक यांच्यावर कठोर कारवाई करून व्यापारी वर्गात असलेली भीती दूर करावी अशी मागणी व्यापारी करीत आहेत.
