15 हजाराची लाच घेताना भूमीअभिलेख अधीक्षक जाळ्यात कोल्हापूर लाचलुचपत प्रतिबंधकची कारवाई
तक्रारदाराच्या बाजूने निर्णय देण्यासाठी तक्रारदाराकडून 15 हजार रुपयाची लाच घेणारा भूमी अभिलेख जिल्हा अधीक्षक सुदाम जाधव हा लाचलुचपत प्रतिबंधक विभागाच्या जाळ्यात अडकला.जाधव यांच्या वाहनावरील चालक उदय शेळके यालाही या गुन्ह्यात अटक झाली.सोन्या मारुती चौकातील भूमी अभिलेख कार्यालयात मंगळवारी दुपारी ही कारवाई झाली .
लाच लुचपत प्रतिबंधक विभागाने दिलेल्या माहितीनुसार भूमी अभिलेख कार्यालयात अर्ज केलेल्या व्यक्तीला त्याच्या बाजूने निकाल देण्यासाठी जिल्हा अधीक्षक सुनील जाधव यांनी लाचेची मागणी केली.तडजोडीनंतर पंधरा हजार रुपये देण्याचे ठरले.याबाबत अर्जदाराने लाच लुचपत प्रतिबंधक विभागाकडे तक्रार दिली.
तक्रारीची पडताळणी झाल्यानंतर उपाधीक्षक सरदार नाळे यांनी मंगळवारी दुपारी सोन्या मारुती चौकातील भूमी अभिलेखाच्या कार्यालयात सापळा रचला.यावेळी तक्रारदाराकडून 15000 रुपयांची लाच घेताना अधीक्षक जाधव आणि त्याच्या वाहनावरील चालक शेळके या दोघांना पथकाने रंगेहात अटक केली.वरिष्ठ अधिकारी लाचलुचपत प्रतिबंधक विभागाच्या जाळ्यात सापडल्याने भूमी अभिलेख कार्यालयात खळबळ उडाली.
