भाटगांव ता.चांदवड येथील जिल्हा परिषद प्राथमिक शाळा आणि नूतन माध्यमिक विद्यालय यांच्या संयुक्त विद्यमानाने मतदान जनजागृती संदर्भात पालक मेळावा

भाटगांव – आपल्या भारत देशामध्ये निवडणुका घेण्यासाठी निवडणूक आयोगाची स्थापना 25 जानेवारी 1950 रोजी करण्यात आली. त्यामुळे हा दिवस देशात राष्ट्रीय मतदान दिवस ( मतदान जनजागृती दिन ) म्हणून साजरा केला जातो.

आपल्या देशामध्ये निवडणुका घेण्यासाठी निवडणूक आयोग ही स्वायत्त्व संस्था आहे. निवडणुक आयोगाची अशी अपेक्षा आहे की, प्रत्येक भारतीय नागरिक मतदान करण्यासाठी मतदान केंद्रावर आला पाहिजे व त्याने मतदान केले पाहिजे. खरंतर प्रत्येक गावात, शहरात, तालुक्यात, जिल्ह्यात, राज्यात एवढेच नाही तर देशात मतदानाचा दिवस हा एखाद्या सण-उत्सवाप्रमाणे साजरा केला पाहिजे. मतदार हा लोकशाहीचा भाग्यविधाता असतो. आपल्या भारत देशातील लोकशाही ही जगातील सर्वात मोठी लोकशाही आहे आणि या लोकशाहीची ताकद आहे, आपल्या भारत देशातील जनता. आपल्या भारत देशामध्ये वयाचे १८ वर्षे पूर्ण झालेल्या प्रत्येक स्त्री-पुरुषास मतदान करण्याचा अधिकार मिळतो. दर ५ वर्षांनी होणाऱ्या भारतीय निवडणुकीत मतदारांनी बजावलेल्या मतदानाच्या अधिकारातून केंद्रात, राज्यात, जिल्ह्यात, तालुक्यात शासन स्थापित होते. निवडणुकीत मतदानाचा हक्क बजावला पाहिजे, चांगले राज्यकर्ते, लोकप्रतिनिधी निवडून देण्यासाठी आपल्या प्रत्येकाचे एक-एक मत कसे महत्त्वाचे आहे, हे मतदान जनजागृतीच्या माध्यमातून प्रत्येक नागरिकाला समजावून सांगण्यासाठी भाटगांव तालुका चांदवड जिल्हा नाशिक येथील जिल्हा परिषद प्राथमिक शाळा आणि नूतन माध्यमिक विद्यालय या दोन्ही शाळेने संयुक्तरीत्या पालक मेळावा आयोजित केला होता.

या मतदान जनजागृती मेळाव्याप्रसंगी नूतन माध्यमिक विद्यालयाचे कलाशिक्षक श्री. देविदास हिरे सर यांनी आणि दोन्ही शाळेतील शिक्षकांनी शाळेतील विद्यार्थ्यांना योग्य मार्गदर्शन करून विद्यार्थी साखळी तयार करून “मतदान करा” असे नाव तयार करून नागरिकांना मतदान करण्यासाठी प्रोत्साहित केले.

यावेळी दोन्ही शाळेतील विद्यार्थी, विद्यार्थ्यांचे पालक आणि गावातील नागरिक मोठ्या संख्येने उपस्थित होते.